وەرە هاوڕۆحم ...
زمانی دڵ بەر شەنەبای وەرزی ساڵ بدەین
شەڕو شۆڕی باوو بۆران و ڕێبەندان
بە توولەڕێیەک واڵابکەین
بە سینەی پڕ وەحشەتی نزیکبونەوە
شا ڕێی پێکگەیشتن بکەینەوە
وەرزی گوڵان
بەفرو هەتاو .. گەڵا و خونچە
بە مۆری لێو لەسەر کوڵمە ڕاگەیەنین .
وەرە هاوڕۆحم ...
هەڵکە لەگەڵ کازیوەدا
شنەی وەسڵێ بخەمڵێنە
بۆ بەرامەی عیشوە و نازت
کۆشکی هەستم ببزوێنە
مودەتێکە موحیبەتت
لەقۆزاغەی پۆخەپەمۆ حەشارداوە
لە ( وەرزی سەهۆڵبەندان) دا
کورەی دڵم بەگڕی عیشقت جۆشدەرەوە .
وەرە هاوڕۆحم ...
لە ئێوارە ژوانێکی تەڕ
لەژێر ڕێژنە بارانێکی بەخوڕ
چاوی چاوەڕوانیم
بە دیدارت ڕۆشنکەوە
گەمەی بەفرانبار و ئاڵۆزی ژیان
بەئامێزی گەرم و چرپەی ماچ
ڕێکەوتنی گوڵ و شەختە
بە گوێی بووندا بچرپێنین .
سروەی بەیان٭
ليست هناك تعليقات:
إرسال تعليق